MUI RWNGY KHUK KEPLE O
Salsa biragirok ni moha bujon eba chalai mung
kotor. Jotono thang sogwi bai kha.Phiya Subudh bura mungwi khoroksa bura kisisa
lerma bai no, boh bini logesong no slab liya. Saichung no lam ma rina klai kha.
Bolong lama o yakung lam saichung no himte himte him kha. Jora o khachikma,
jora o ba twlwk yapri rigwi.Taltung jora ni saltung bo belai no khirijak. B’kha
khlai o, lama kolok jotono no bohno kwbagwi nasi nai – haba rijak. Yakung yapri
seb na suda se tuk si o. A Subudh burani twlwk twlwk yapri no nuhurwi yonglasa
belai no kha thangsa jak wi chibuksa ni bukhugo kabra kachigwi kab twtwi
sahoro, o probu, nwng phano ano mwthang jasidi, ano mwthang jasidi. Ang le thwi
nai kha, uarwi monogwi pai nai kha chibuksa. Ano mwthangwi man khwlai nwngle
dormo kwplwng mansiano.
Ayango, chibuksa bo machaya mwi keplejakna kiriwi Subudh
bura no kabwi sahor phi o,– “O probu, nai di ang le salsa ni ogo mai se krwi”.
Machaya manung ya no thwinai kha .Chikonte mui man ma suda se nwng bohno
phiyogwi rwkhe ang machaya se thwisiano. Probu khairok jadi.
A
biragi Subudh burasa pal manjak liya. Sabono khairok sinai, sabono
mwthang sinai, Uana o ayang bo sak ba bhujon de keple no, sak no khe sabo
khairok no ! Hama kolok rohorwi Subudh bura bo sakha, “Khnadi nirok, Yongla
nwng thang na muchuk khe, ta lule di, sring sring khe tong di Tei
chibuksa nwngbo machayaokhui suk kha khe tei chana muchuk sok kha hwn khe,
uarma ta yakar di hwnwi sawi Subudh burasa arono bujon kotor eba chalaimwng
kotor panda manjagwi jolima pai liya kiphilwi lam rikha’’.
Ayang biragi burasa satwi no yongla bo lule liya kwthwi hai sring
khe tong kha. Chibuksa khe ba yongla thwse thwi khna hwnwi kha kawi no uarma
yakarwi monok na nai kha. Hakhe seb kaham manwi yonglasa bahorwi khachik lang
kha.
Chibuksa mwi manwi bo khuk keple kha, Subudh
bura keple kha chalai mwng kotor panda, yongla khe ba man kha kwtal langma.
No comments:
Post a Comment