Koklob-1

TRIPURA HANI HUKUMU

B'kha mekhegwi nai khe

Tripura hani hukumu

Chini ha amani mukumu.

Ha tongwi bo ha kwrwi hai

Nok tongwi bo nukhuhng kwrwi hai

Khuk tongwi bo kokthai kwrwi hai

Baithang thang kha imang chai,

Imang palmaya lampra phai.

Chwng borok

Mani khukni kok

Kokborok.

Abono hukumu ni bokhorok.

Mano hamjakya,

Takhuk kwmanai,

Tongkthar nwngbai chalnai.

Khukno hamjakya

kokthai kwmanai,

Sak nangya buini wngnai.

Buino hamjakya

Sak kwmanai,

Bui bai cherjakya wngnai.

Halok siniya

Jaiti kwmanai

Tongthai haphar bo thaknai.

Thanti hamjakya

Ri kwmanai,

Bui ni lachima man nai.

Sakno hamjakya

Baithang kwmanai,

Tongya mukumu painai.

Samung hamjakya

Chamung kwmanai,

Tola o bui ni wngnai.

Mukumu cherya

Hukumu kwmanai,

Dopha kwlwgwi thangnai.

Joto no paisogwi thangnai.

Yagulo,

O ha bo chini kwma suknai.