Koklob-25

ULNI YAPRI

Khna kha de ?

Ung klogo sabo bo chirigo.

Satung kwprama, nokha kuphurma

Tamo ahai uatwi bo kwlaio.

Naidi ihko –

Bolong mwkhang, simalwng khorang,

Tokha twi kangjago.

Salka bwkhakni, yapri chongkhlengni,

Nung khwna abole Gomati twimani.

Khna kha de ..

Tabuk le chirikmani?

Nokha somyawi nokha gurumo,

Uatwi uayawi no twi kwlaio.

Panthorni yongwla bo uatwi birlaio.

Satung gwnango nokha philigo,

Philiksa philikma bai sal mogwi bathago.

Salgrani boga dolsogwi khachigo,

Nugui chwraisa tongthok chirigo

‘Boga ulni swkang lai,

Bwskang ungklok phai’.

Khnawi bupha bwtwi bai kephek

Chwrai bujagwi kwlaio.

Ulni ulono tongrwgo,

Bwskang bo ungklogo bathago!

Mwnwi Kothok Kok-2

Salsa Tiprasarok gain mwsanani bagwi uanjwi barrio thanglai kha. Jotono soi sai wnglai kha. Dangsarok bo bebakno naithok khe swnamjak kha. Bororok bo kuthumjak aswkno. Phiya nokha se chathaya achomsa tamo jani mokjak. Gain mwsanairok bo jugal laite laite jugalwi tongmani jorao, ayang chwmwi uahtwi bo sampawi phaisa kha. Nokbar kwchang kwchang, nokha philik philik wngsai phaio. Jotono saiman kha uatwi jekhephano phainai kha. Ayang gain bodol ni bokhorok eba manager bo biyang jani bo thangma phaiya khu ah gain phunuknai bodol ni bokhorok bai, bohni swlai swkang uatwi se phairwnai kha. Ayang lukurok khe ba kuthumlaijak bujuk ni simi gain nainani bagwi. Bohrokno bahai khe tini uatwini bagwi mwsa laiman lai naliya khwnao nailai sinai hwnwi kok uanjwi kok bai bahai khe salai sinai! gain mwsanai rokni uanalaijak. Bohno boh berlaiwi tonglai kha. Kebo bachawi sainani mwkhang tei phan kwrwi kha. Yagulo khe khoroksa thangwi sai te kha phun! –

- Ajka hoile mara mari, kalka hoile pwtlak (tini uatwini bagwi mwsa laiman lai naliya khwnao nailai sinai hwnwi kok uanjwi bai samani phun).

Hwnwi samani loge loge jotono gain no mwsana cheng khwna hwnwi yapha khorop lai kha. Hakhe uatwi bo ho..o sakhe uai rwkha tei jotono srai ma khar bai kha phun!!!

Mwnwi Kothok Kok-1

MAYUNGNO KOK UANJWI BAI DANTWLA ???

Aige ni kok. Salsa mayung kwthwng dol sowi laithang drop. Tuislung lungao bo chini Tiprasa sagnangma bwrwi bodol yagul khilwi kheto mai bor lai tongmani jora. A jorarogo khe chini dopharok kisisa kheto o ong khorna rwng drop gwja khu. Hwnwi kheto al chuai khe bo, bahai khe chuai sai de man? Kheto kitingwi guriwi chuaite chuaite kwcharo khe musuk jungor bai khonwi chuai man ya khe gudal bai ma chogwi se ma pai phun! Mayung kwthwng bodol laithang drop kheno biyangni uansa bepari bo ah mayung kwthwng thangma twino lamriwi thangwi tongo. Abono nugwi mai borlai tongma bisingni kebo khoroksa ah uanjwi no sahor kha -

- Hoi uanjwi?

- Kita bachoi? Uansa jora riwi swnghoro.

- Hei dike ….  aoi…tamo si hwn khamu? (Mayungno kok uanjwi bai tamo hwn pokjagwi thang kha).

- Hei dike kita bachoi? Haino hai uanjwi bo swnghor phio.

Muitu manjak liya. aphuru khe teisa loge palsong mai bornai hamjwk khoroksano swngte kha phun.

- Mabwsa, mayung no kok uanjwi bai tamo si hwn khamu?

- Dantwla se hwn na bla sa. Mabwsa bo khorok puktwtwi sajakha.

Pal manjakya uansa mwlang chawi tongo. A bwrwima teisa sahor phio –

- Hoi uanjwi, hei dike dantwla gese to……dantwla.

- Dantwla kita bachoi? Uansa buchiwi manjak liya!!!

- Au.. dantwla gese..eh… kongwi mai bortwtwi sahoro.

- Kita bachwi ??? Bujiwi manjak sok liya khorok puktwtwi uansa ayang bwkhak twihno lam riwi thango. Nugwi buiso thangjak laiwi brwi sagnangmarok sahor laio –

- Uansa bwsa kok khnaya thwiwi tongwi di ayango!!!!

Koklob-24

KAMI AMCHOINI MWKTRWI

Kami amchoini mwktrwi ba

Tamo aswk swraya ba wng kha!

Aswk hor no romwi sal kiphilo,

Sal phai phiwi horo thang phio

Aichuk; aichugono bathak tongrwgo

Toglani khorang bo kokthai wngwi bathago

Sal talo, tal bisio laithango

Phiya kami amchoini baithang

Mwktrwi bai lobjagwi

Bisingo tei bo bisingo.

Chwrwisa ni bothobo golika soh kha

Mayam nogo sinjosa nokphang achugwi

Nokbraisa khar kha.

Bolong ni togla

Nokhla phaiwi chirigwi kochik kha.

Aichuk ni nokbar berao bujak kha.

Kami amchoini mwktrwi bai bo b’khasiya

Tei bo rijai kathonwi

Khuchlak mukchlak mwktrwi bai romjagwi thango.

Koklob-23

SAL HAMYA NI SATUNG

Bolong ni tokha thaichumu

Sakani naithokma bukur

Kwchak chathothok kumun.

Bolongni khachuk twislung

Bwswk tongthothok kwchang.

Kwthwng kwrak bini khapang!

Maisingni satung hai

Srapsa ni tongthok nukjak twih

Hohr no khapango huiwi

Bui bai kaham hwnjak twi

Khukni kok kwtwi

Abohrok wng kha, swkango satwi.

Sakno hamjagwi, sak koiligwi

Thapa korojak hai

Khapang hangar no bangriwi

Kok khrek hama khwlaiwi

Bwswk le wng kha ba!

Sal hamya ni satung!

Koklob-22

SWKANG TALIKHA

Kwpalo swijak kokthai ni

Mwkhang hui man ya.

Bwskang ni koktwma tamo wng no

Swkang sai man ya.

Boroni riyor, biyangni kochok

Biyang ba thangwi gothok.

Kuchuk hathai rekesai

Kasai thang khe,

Hama ba tamo swk do!

Hathai ni naikhlai nokhorwi phai khe

Rangma bathak riwi,

Tongthokma khairokma bai

Sabo ba aswk soh!

Hor aikhe sal phaio,

Sal bai hor no chwmwi kobolo.

Kwpal talikha bijabrok

Thinang bai no philjago,

Thinang bai no boljago,

Sai man ya swkang le bahai bo wng no!

Koklob-21

OJONO KWRWI KEBO

Nokhani athukiri no nugui

Khatungjago chengkharuk.

Iko ani bayab takhukrok,

Bwswk kuchuk bohrok.

Khatungwi thangna muchungjago.

Kuchuk tokling no nuhurwi

Uri, mwisrwngrok Kaitor ni thani

Bwkrang biro.

Naisik di hwnwi

Kaitor ni khairokmwng bai

Khatungma khachik birsao.

Chati ni pohor no chuknoha khakao,

Khamwi kwlaiwi thwio.

Chama nuk khe bui no

Bukhuk muchungo.

Bukhugo nang khe tei bo sano.

Sak ni sampili no sak no chukhruwi

Kuaro mwsasa thwio.

Ojono kwrwi kebo.